Сұрақ: Ислам даналыққа жетелей ме?
Жауап: Даналық – ақылдылық пен парасаттылық, көргендік, кемеңгерлік, өмірлік тәжірибе мен дұрыс шешім қабылдай білуге негізделген қасиет. Ислам дінінде даналыққа жету мәселесі баяндалған.
Даналық бірден келетін қасиет емес. Ол білім іздену арқылы, тақуалық және дұрыс амалдар арқылы қалыптасатын нығметтің бірі. Даналыққа қайшы жаман қасиеттер – нәпсіге еру, такаппарлық, сараңдық т.б.
Ал, асыра діншілдер Ислам тағылымын біржақты пайымдап діни фундаментализмге бой алдырады. Бұл дәстүрлі Исламның бағыттаған жолы емес. Керісінше, радикализмге уланған уағызшылар жолы.
Исламда даналыққа жетудің негізгі жолдары мыналар: Құран ілімін тереңдеп түсіну, өмірде қолданатын пайдалы білім іздену, тақуалық жолын ұстану, пайғамбарымыздың (с.а.у.) өнегесін білу, жаратылыс пен өмірдің мәнін дұрыс пайымдау, Алладан тура жол мен хикмет сұрау, жақсы адамдардың тәжірибесі мен көркем мінездерін үйрену, өмірде көрген-білгеннен дұрыс сабақ алу, кішіпейілділік, адалдық, адамгершілік сынды қасиеттерге ие болуы. «Бақара» сүресінің 269-аятында: «Ол хикметті (даналықты) қалаған пендесіне нәсіп етеді. Кімге даналық берілген болса, расында оған қыруар игілік берілгені», деген.
Демек, даналық тек біліммен емес, білімді орынды қолдану мен көркем мінез арқылы қалыптасады екен.
Икрам АЙТАЕВ
