Мұғалім мен оқушы арасында болған шағын диалог. Тақырып: деструктивті діни ағымдардың қаупі.
Мұғалім: Балалар, бүгін біз маңызды тақырыпты талқылаймыз. Жат діни идеология дегенді қалай түсінесіңдер?
Оқушы: Меніңше, бұл – адамның діни сеніміне әсер етіп, оны өз көзқарасына бағындыруға тырысатын ағымдар.
Мұғалім: Дұрыс айтасың. Мұндай топтардың басты мақсатының бірі – адамның санасын билеп, өзіне тәуелді ету. Олар кейде әдемі сөз айтып, ізгілік пен әділдікті алға тартып, жастардың сеніміне кіреді.
Оқушы: Олардың қауіпті екенін қалай ажыратуға болады?
Мұғалім: Мысалы, біреу саған: «Ата-анаңның сөзін тыңдама, достарыңмен араласпа, тек біздің айтқанымыз дұрыс» десе, ойланып көргенің жөн. Адамды отбасынан оқшаулау, өзге пікірді жек көруге үйрету, сұрақ қоюға тыйым салу – алаңдатарлық белгілер.
Оқушы: Ал дінге сенетін адамның бәріне күмәнмен қарау керек пе?
Мұғалім: Жоқ, әрине. Діни сенім – адамның жеке таңдауы. Біз өзге сенім иелерін құрметтеуіміз керек. Бірақ дінді жеккөрушілікке, алауыздыққа немесе заңсыз әрекетке пайдалануға жол бермеуіміз қажет.
Оқушы: Егер әлеуметтік желіден күмәнді діни уағыз көрсем, не істегенім дұрыс?
Мұғалім: Бірден сеніп, өзгелерге таратпа. Ақпараттың қайдан шыққанын тексер. Ата-анаңмен, ұстазыңмен немесе білікті дінтанушы маманмен ақылдас. Ең бастысы, кез келген ақпаратты ақыл таразысына салып үйрен.
Оқушы: Түсіндім, ұстаз. Демек, діни сауаттылықпен қатар, сыни ойлау да маңызды екен ғой.
Мұғалім: Дәл солай! Білімді адам әр нәрсеге байыппен қарайды. Өзінің кім екенін, қандай қоғамда өмір сүріп жатқанын және қандай құндылықтарды құрметтейтінін біледі. Сендердің міндеттерің – білім алып, елдің бірлігі мен татулығын бағалайтын азамат болып қалыптасу.
Ж.Бақытбек










