Сұрақ: Өмірге қарғыс айтуға бола ма?
Жауап: Алланың адамзатқа берген ұлы нығметтерінің бірі – өмір. Мұсылман адам жақсылық та, жамандық та Алланың қалауымен болатынына сенеді. Қиындық пен әділетсіздікке кезіккенде өмірге налу, ренжу немесе шаршау – кез келген адамның басынан өтетін жағдай. Бұл сезімді бастан өткеру қалыпты нәрсе.
Исламда өмірге налу, сөгу Алланың жазған тағдырына наразылық білдіру болып саналады. Қиындық келгенде сабыр сақтауы, ал нығмет берілгенде шүкіршілік ету – имандылықтың белгісі. Ислам тағылымы қиындыққа бола өлім тілемеуге, керісінше Алладан қайырлы өмір мен жеңілдік сұрауға кеңес береді. Ал, психологиялық кеңесте налу жанның көмек сұрап, демалыс не өзгеріс қажет екенін білдіретін белгісі десе, осы күйде ұзақ қалып қою депрессияға әкелуі мүмкін делінеді.
Пайғамбарымыз (с.а.у.) хадисінде: «Алла Тағала былай деді: адам баласы заманға тіл тигізеді. Ақиқатында заман менікі, күндіз бен түн менің құзыретімде», тағы бір хадисінде: «Бес нәрсе келмей тұрып, бес нәрсенің қадірін біліңдер: өлмей тұрып өмірдің қадірін; бір нәрсемен шұғылданбас бұрын бос уақыттың қадірін; ауырмай тұрып денсаулықтың қадірін; қартаймай тұрып жастық шақтың қадірін; кедейліктен бұрын байлықтың қадірін», деген.
Демек, өмірге реніш білдірмей бір қиыншылыққа сабыр етсе, артында екі қуанышы бар екен.
Икрам АЙТАЕВ











