Сұрақ: Жындар не нәрсеге үйір болады?
Жауап: Жын – көзге көрінбейін жаратылыс. Біз оларды сезім мүшелерімізбен байқай алмаймыз. Жын жайлы деректер Құран аяттары мен хадистерде баяндалады.
Сондай-ақ әлеуметтік желілерде жын шығарумен айланысатын адамдар да байқалады. Дегенмен жағдайды жын тиді деп бағалау дұрыс шешім емес. Жалпы Ислам танымында жын-шайтандар лас, нәжіс, қоқыс, рухани бостыққа және күнәлі істер жасалатын ортаға үйір болатыны айтылады. Яғни, дәретхана, жуынатын бөлме және қоқыс жиналған жерлерде жындардың болатыны рас. Сондай-ақ жуылмаған ыдыстар мен беті ашық қалған тағамдарға шайтан жақындайтыны, ішімдік ішілетін, темекі шегілетін, балағат сөздер айтылатын және үнемі айқай-шу мен ұрыс-керіс болатын орындар мен адам тұрмайтын, ұзақ уақыт қараусыз қалған және жарық түспейтін бөлмелерді жындар паналайды деген ақпараттар кездеседі.
Дегенмен үйге кіргенде және тамақ ішер алдында «Бисмиллә» сөзін және білетін Құран аяттары мен дұғаларын айтып жүру аздық етпейді. Үй ішін таза ұстап, қоқысты уақытылы шығарып отыру мен түнгі уақытта тамақ пен су құйылған ыдыстардың бетін жауып қою дұрыс амалдардан.
Икрам АЙТАЕВ
