Сұрақ: Күнәлі істерден қалай арылуға болады?
Жауап: Ислам діні халал мен харамның, сауап пен күнәнің айырмасын айқындап берген. Жақсы амалдарда Алланың ризашылығы мен сауабы болады. Қайтарылған күнә амалдарда Алланың ризашылығы болмайды. Алланың Мейірімді, Кешірімді сипаттары бар екендігін ұмытпағанымыз абзал.
Пенде нәпсіге еріп немесе надандығымен күнәға жиі баруы мүмкін. Ең қайырлысы күнә істен өкініп, кейін тәубеге келуі. Күнә іс Алла мен пенденің арасындағы (намаз, ораза, зекет, харам істерден тыйылу сияқты т.б. әмірлер мен тыйымдарға) істерге қатысты болса, шарттары бар. Жасалған күнәдан бас тартуы, күнә жасағандығына өкініш білдіруі, күнәны екінші рет жасамауға бел байлауы сынды шарттар.
Ал егер жасалған күнә басқа бір адамның ақысына (затын ұрлау, ақысын жеу, ғайбат айту т.б.) қатысты болса, онда жоғарыдағы шарттарынан кейін, ақысын қайтару немесе кешірмін алуымен толық болады. Сондай-ақ шынайы тәубемен Алладан кешірім сұрап, истиғфар айтып, дұға жасап, намаз сынды құлшылық амалдарын толықтыруы қайырлы болмақ.
Пайғамбарымыз (с.а.у.) хадисінде: «Барлық Адам баласы қателесуші. Бірақ сол қателесуші пенделердің ішіндегі ең жақсылары – тәубе ететіндері», деген. Демек, күнә істедім деп тұңғиыққа түспей, дер кезінде өкініш білдіріп, жақсылыққа ұмтылған абзал екен.
Икрам АЙТАЕВ
