Сұрақ: Исламда білім алу жайында не айтылған?
Жауап: Исламда білім алу – басты талаптың бірі. Адам білім арқылы дүниетанымын кеңейтеді, ақ пен қараны, дұрыс пен бұрысты ажырата алады. Ал, кейбір діни топтар секілді білімді діни және дунияуи деп бөліп жаруға болмайды. Діни білімнен басқасы пайда әкелмейді, қажеті жоқ дейтіндер фанатизмге бой алдырады.
Дәстүрлі Исламда білімді діни немесе дунияуи деп, шектеген немесе тыйған жерлері жоқ. Діни танымдық дерек көздерінде Құранда білімге қатысты тікелей немесе жанама сегіз жүзге жуық аят пен нұсқаулық бар екендігі айтылады. Құран аяттарында «Ойланбайсыңдар ма?», «Ақыл иелері үшін белгілер бар» «Егер білмесеңдер, білім иелерінен сұраңдар», «Айтшы, білетіндер мен білмейтіндер тең бола ма?» деген ескертулер көп кездеседі.
Сондай-ақ астрономия, медицина, география, биология, т.б. білім салалары бойынша да ой жүгіртуге шақырады. Діни білімге құштар болғандар интернеттегі жалған шейхтардан емес, дәстүрлі діни білім беретін оқу орындарынан алғаны абзал.
«Мужадилә» сүресінің 11-аятында: «Алла сендерден сондай иман келтіргендердің және ғылым берілгендердің дәрежелерін көтереді», деген. Демек, Исламда пайдасыз білімнен қайтарып,кемелдікке жету үшін алған білімді тәкаппарланбай өмірде қолдану қажеттілігі айтылған екен.
Икрам АЙТАЕВ
