Flydubai әуе компаниясының екінші ұшқышы Хамам әл-Хаммами Тель-Авивке ұшатын әуе тасымалдаушыларын зерттеп, шабуыл жасау үшін осы компанияны таңдағанын мәлімдеді. Ол Бен-Гурион әуежайына ұшақты бағыттауды жоспарлағанын жауап алу кезінде айтқан, деп хабарлайды Egemen.kz.
«Мен барлық әуе компаниясына жұмысқа орналасуға тырыстым. Компанияға қабылданғанға дейін-ақ операцияны жоспарладым», деді әл-Хаммами.
The Jerusalem Post басылымының мәліметінше, күдікті соңғы айларда ұшқыш ретінде Израильге бірнеше рет барған. Шілдедегі сапарларының бірінде ол шабуылға дайындалып, ақпарат жинаған. Кейін ұшақты Израиль аумағына құлатуды жоспарлағанымен, экипаж мүшелерінің біріне жақын болғандықтан шабуылды кейінге қалдырған.
Италиялық Corriere della Sera газеті Израиль барлау қызметіне сілтеме жасап, әл-Хаммамидің Тель-Авивтегі зәулім ғимараттарға ұшақ бағыттауды жоспарлағанын жазды. Басылымның мәліметінше, шабуыл жоспары әскери ұшақтар әуе көтерілгенге дейін жүзеге асатындай етіп жасалған.
Хамам әл-Хаммами бұған дейін Oman Air компаниясында жұмыс істеген. Басылымның мәліметінше, ол компаниядан ислам экстремизміне жақын көзқарастарына байланысты босатылған. Сегіз ай бұрын Flydubai әуе компаниясына жұмысқа қабылданған.
Еске сала кетейік, 30 қыркүйекте Дубайдан Тель-Авивке бағыт алған Flydubai ұшағы дабыл белгісін беріп, Сауд Арабиясына шұғыл қонды. Оқиғаға ұшқыштар арасындағы жанжал себеп болған. Ұшқыштардың бірі екіншісіне шабуыл жасап, ұшақты өз бетінше басқаруға әрекеттенген.
