Сұрақ: Намаздың дұрыс болу шарттары қандай?
Жауап: Намаз – балиғат жасына жеткен, ақыл-есі дұрыс, әр мұсылман ер кісі мен әйелге парыз. Бес уақыт намазды шынайы ниетпен дұрыс орындаған адамға мол сауап бар. Намаздың кәміл болуы үшін ғұсыл мен дәреттің дұрыс болуына мән берген дұрыс. Ниет дұрыс болмай, риямен оқуда сауап болмайды.
Ислам құқық еңбектерінде намаздың сыртқы және ішкі парыздары кең баяндалған. Мына шарттар қажет: Дәрет алу немесе ғұсыл қажет болса ғұсыл құйыну (кіші және үлкен дәреттен тазалану), дененің, киімнің және намаз оқитын жердің таза болуы, ер адамдардың кіндік пен тізе арасын (тізені қоса), ал әйелдердің беті мен қол, аяқтарынан басқа денесін жабатын киім киюі, намаз оқығанда Құбыла бағытына жүз бұруы, намазды өз уақыты келмей тұрып оқымау, әр намазды тиісті уақытында орындауы, қандай намаз (парыз, уәжіп, сүннет) оқитынын жүрекпен қалау және тілмен айту.
Өзге де мәліметтер қажет болған жағдайда, ҚМДБ-ның ресми сайттарына жүгінген дұрыс. Намаз шарттарын толық орындап, харам амалдардан сақтанып, тақуалыққа мән беру маңызды.
Икрам АЙТАЕВ
