Астанада Әкелер күні қарсаңында Қазақстан Республикасы Мәдениет және ақпарат министрлігінің қолдауымен «Жауапты әке – тұрақты қоғамның тірегі» тақырыбында қалалық әкелер форумы ұйымдастырылды.
Форумның мақсаты – қоғамдағы әке институты мен отбасы құндылықтарын нығайту, әкенің бала тәрбиесіндегі рөлі мен жауапкершілігінің маңызын дәріптеу және ұлттық құндылықтарға негізделген саналы ұрпақ тәрбиесіне ықпал ету.
TEDx форматында өткен іс-шараға мемлекеттік органдардың өкілдері, қоғам қайраткерлері, депутаттар, білім саласының мамандары, психологтар, кәсіпкерлер және әкелер қауымдастығының мүшелері қатысты.
Форум барысында қатысушылар әкенің отбасы мен қоғамдағы жауапкершілігі, бала тәрбиесіндегі орны, отбасылық құндылықтарды сақтау, қазақтың дәстүрін дәріптеу, сондай-ақ жас ұрпақтың азаматтық ұстанымы мен адамгершілік қасиеттерін қалыптастыру мәселелерін талқылады.
Спикерлер ой-пікірлерін ортаға салып, қоғамдағы әкенің беделін арттыруға бағытталған бастамаларын таныстырды.
Жиын аясында әке институтын нығайтуға, отбасы құндылықтарын насихаттауға және жас ұрпақ тәрбиесіне сүбелі үлес қосқан белсенді әкелер мен қоғам қайраткерлері марапатталды.
Форум соңында Астана қаласы Әкелер одағы мүшелері балаларымен бірге «Әкелер гимнін» орындады. Бұл шығармашылық жоба әке мен бала арасындағы байланысты нығайтып, отбасы құндылықтарын дәріптеуді мақсат етеді.
Айта кетейік, 22 маусым күні Талдықорған қаласында XI Республикалық әкелер форумы өтеді.
