Сұрақ: Екі немесе үш әйел алу сүннет пе?
Жауап: Ислам дінінде көп әйел алу міндеттелген парыз немесе сүннет амалдар санатынан емес.Ислам шариғатында нақты бір қажеттілік жағдай болса, әділдік жүргізе алса, рұқсат етілген амал.
Қазақ дәстүрі мен ислам дінінде екінші әйел алу белгілі бір қағидалар мен шарттарға негізделген. Бұл рұқсат нәпсіқұмарлық үшін емес, жесірлер мен жетімдерге қамқорлық жасау, бірінші әйелдің ауруы немесе бедеулігі секілді зәрулік жағдайларға байланысты болған.
Ал, дүнием бар деп, нәпсі үшін жас қыздарды некелеп алу шариғат бұйырған талаптардан емес. Тарихта бай, беделді немесе билік иелері (билер, хандар, батырлар) ұрпақ жалғастыру, ру аралық одақ құру немесе жесір әйелдерді қорғау (ағасы өлгенде інісінің әмеңгерлікпен алуы) мақсатында екінші әйел алғаны белгілі.
Қазақстан Республикасының заңнамасы бойынша көп әйел алуға рұқсат етілмейді және ресми неке тек бір әйелмен ғана заңдастырылады.
Қазіргі таңдағы деструктивті діни ағым өкілдері көп әйел алуды міндет деп үгіттеп жүргені белгілі. Мұндай насихаттың салдарынан қасиетті неке мен отбасы ұғымы аяқасты болып жатады. Демек, нәпсі қалауын шариғаттың талабы деу саналы адамның ісі емес екен.
Икрам АЙТАЕВ
