Астана қаласының Арбат алаңында «Сарыарқа» аудандық ардагерлер кеңесі мен «Сарыарқа» ауданының «Белсенді ұзақ өмір сүру орталығы» бірлесіп ұйымдастырған «QYMYZ FEST – Қымызмұрындық 2026» этно-фестивалі өтті. Ұлттық құндылықтарды ұлықтауға бағытталған бұл ауқымды шара қала тұрғындары мен қонақтарының басын қосып, халқымыздың бай мұрасын дәріптейтін тағылымды мерекеге айналды.
Қымызмұрындық – қазақ халқының көне дәстүрлерінің бірі. Көктем шығып, бие байланып, алғашқы қымыз ашытылған шақта ауыл-аймақ жиналып, ақтан дәм татып, ақ тілектерін арнаған. Бұл дәстүр береке мен молшылықтың, татулық пен ынтымақтың нышаны саналады. Бүгінде ұлттық мұраны жаңғырту мақсатында ұйымдастырылған мұндай шаралар жас ұрпаққа ата дәстүрдің маңызын түсіндіруге зор ықпал етеді.
Фестиваль қонақтарын ұлттық киім киген қызметкерлер қарсы алып, мерекелік алаңда қазақы нақыштағы ерекше атмосфера қалыптасты. Қонақтар Белсенді ұзақ өмір сүру орталығының әжелері дайындаған қолөнер көрмесін тамашалап, ұршық иіру өнерінің қыр-сырымен танысты. Ұлттық мұраны насихаттауда аға буынның өнегесі мен тәжірибесі көпшілікке ерекше әсер қалдырды.
Іс-шараның шарықтау шегі «Тұмар» этно-фольклорлық тобы сахналаған «Қымызмұрындық» дәстүрінің театрландырылған көрінісі болды. Жетекшісі Санат Мамешова бастаған өнер ұжымы ата-бабамыздан мирас болған салттың мәні мен мазмұнын көрерменге әсерлі жеткізе білді. Қымыз пісу рәсімі, ақсақал батасы мен шашу шашу көріністері ұлттық рухты асқақтатты.
Фестиваль аясында қонақтарға қымыз ұсынылып, ұлттық тағамдардан дәм таттыру ұйымдастырылды. Сонымен қатар асық ату, ләңгі тебу, қамшы өру, жілік сындыру секілді ұлттық ойындар өткізіліп, қатысушылар өз бақтарын сынады. Бұл сайыстар халқымыздың дәстүрлі ойындарын дәріптеп қана қоймай, жастардың ұлттық мәдениетке қызығушылығын арттырды.
Мерекелік концерт бағдарламасы да көпшілік көңілінен шықты. Сахна төрінде этно-фольклорлық ансамбльдер, вокалдық және би топтары өнер көрсетіп, қазақ әні мен биінің әсем үлгілерін ұсынды. Ұлттық өнер мен мәдениеттің үндестігі мерекенің мазмұнын байытып, көрермендерге көтеріңкі көңіл күй сыйлады.
«Қымызмұрындық – береке мен бірліктің мерекесі. Қымызмұрындық – тек ұлттық сусынның қадірін арттыратын мереке ғана емес, ұрпақтар сабақтастығын, ата дәстүрге деген құрметті дәріптейтін тағылымы терең мереке. Бүгінгі басқосуымыздың басты мақсаты – ұлттық құндылықтарымызды ұлықтап, аға буын өкілдерінің басын қосып, рухани серпіліс сыйлау. Белсенді ұзақ өмір сүру орталығы әрдайым ардагерлеріміздің белсенді, мәнді де, салауатты өмір сүруіне жағдай жасап, ұлттық мәдениетімізді насихаттауға ерекше көңіл бөледі» – деп сөзін түйіндеді Белсенді ұзақ өмір сүру орталығының директоры Серік Қарабатыров.
«QYMYZ FEST – Қымызмұрындық 2026» этно-фестивалі – ұлттық құндылықтарды дәріптеп, ұрпақтар сабақтастығын нығайтқан, береке мен бірлікті насихаттаған тағылымды шара болды. Мұндай игі бастамалар халқымыздың бай мәдени мұрасын сақтап, келер ұрпаққа аманат ету жолындағы маңызды қадамдардың бірі екені сөзсіз.
