Мәслихат депутаты Табулдина Алтыншаш Жұмашқызы Астана қаласы, «Сарыарқа» ауданы бойынша әлеуметтік қызметтер көрсету бөлімінің зейнеткерлерімен есептік кездесу өткізді. Тағылымды шара «Музыкалық жас көрермен театры» ғимаратында ұйымдастырылып, оған ардагерлер, қоғам белсенділері мен қала тұрғындары қатысты.
Кездесудің басты мақсаты – аға буын өкілдеріне көрсетіліп жатқан әлеуметтік және сауықтыру бағытындағы жұмыстарды таныстырып, атқарылған істерді саралау және алдағы жоспарлармен бөлісу болды.
Шара барысында зейнеткерлердің белсенді өмір салтын қалыптастыру, денсаулығын нығайту және қоғам өміріне араласуын арттыру мәселелері кеңінен сөз болды.
Алғашқы сөз алған Табулдина Алтыншаш Жұмашқызы әлеуметтік саладағы маңызды бастамаларға тоқталып, ардагерлерге жасалып жатқан қолдау шаралары жөнінде баяндады.
Іс-шараға қоғам қайраткерлері мен ардагерлер ұйымдарының өкілдері қатысып, аға буынға арналған жобалардың маңыздылығын атап өтті. Олардың қатарында Сансызбай Есілов және Адамбек Кендебай, Асқар Смағұлов, Динара Оразалина бар.
Сонымен қатар, «Сарыарқа» ауданы бойынша әлеуметтік қызметтер көрсету бөлімінің басшысы Кенжеболат Бапишев Орталықтың атқарған жұмыстары туралы есеп берді.
Кездесудің тәжірибелік бөлімінде орталықтағы сауықтыру бағыттарының көрсетілімдері ұсынылды. Қатысушылар «Айкүне» сауықтыру жаттығуы, йога және «Гармония здоровья» клубының оңалту гимнастикасымен танысты. Мамандар бұл жаттығулардың омыртқа саулығын жақсартып, буын қозғалысын қалыпқа келтіруге және жалпы денсаулықты нығайтуға оң әсер ететінін атап өтті.
Мазмұнды шара концерттік бағдарламамен жалғасты. Көрермендерге «Әгугай» этно-фольклорлық ансамблі, «Сарыарқа» би тобы, «Кербез моделс» сән тобы, «Әдемі дәуір» би ұжымы және орталық өнерпаздары өнер көрсетті. Әсіресе ұлттық нақыштағы сән көрсетілімі мен скандинавиялық серуендеу үйірмесінің спорттық композициясы көпшіліктің ыстық ықыласына бөленді.
Кеш соңында Қазақстан Республикасының еңбек сіңірген мәдениет қайраткері Жанарбек Искендыров «Атамекен» әнін орындап, тағылымды кездесуге ерекше рухани әсер сыйлады.
«Тағылымы мол шара аға буын өкілдерінің қоғамдағы белсенділігін арттырып, ұрпақтар сабақтастығын нығайтуға бағытталған маңызды кездесу ретінде есте қалды» – деп ойын түйіндеді Орталық директоры Серік Қарабатыров.
