Қазақстан мұсылмандары діни басқармасы «Уағыз-насихат» бөлімінің меңгерушісі, Республикалық ақпараттық-насихат тобының РАНТ мүшесі Батыржан Мансұров арнайы іссапармен Қостанай облысына келіп, өңірде бірқатар маңызды кездесулер мен рухани іс-шараларға қатысты.
Сапар аясында ол алдымен облыстық «Аймағанбет қажы Спанұлы» мешітінде қала және аудан мешіттерінің бас имамдарына арналған семинар өткізіп, «Уағыз айтудың әдебі мен мәдениеті» және «Ихсан – рухани тәрбие негізі» тақырыптарында дәріс оқыды. Кездесуде дін қызметкерлерінің қоғамдағы орны, уағыз айту мәдениеті және рухани тәрбие мәселелері кеңінен талқыланды.
Сонымен қатар, Батыржан Берденұлы жергілікті ақпарат құралдарының ұйымдастыруымен өткен арнайы подкастқа қатысып, «Таза қоғам және ысырапқа жол бермеу» тақырыбында сұхбат берді. Сұхбат барысында ол ысырапшылдық мәселесіне тоқталып, оның қоғамға тигізетін кері әсері туралы пікір білдірді.
Сапар барысында ол Қостанай қалалық «Жайлаубай ата» мешітінде ақшам намазынан кейін жамағатпен кездесіп, «Жүрек тазалығы» тақырыбында уағыз айтты. Жиналған қауым көкейлеріндегі сауалдарын қойып, тұшымды жауаптар алды.
РАНТ мүшесі Қостанай облыстық төтенше жағдайлар департаментінің қызметкерлерімен де арнайы кездесіп, «Бір адамды құтқарғаның – барлық адамзатты құтқарғанмен тең» тақырыбында тағылымды әңгіме өрбітті. Кездесу барысында адам өмірінің қадір-қасиеті, жауапкершілік және қызметтің маңыздылығы жөнінде сөз қозғалды.
Сапардың қорытындысында Батыржан Мансұров қасиетті жұма күні облыстық «Аймағанбет қажы Спанұлы» мешітінде жұма намазын жүргізіп, Қазақстан мұсылмандары діни басқармасы бекіткен «Жақсылықта жарысу – ізгі қоғам кепілі» тақырыбында уағыз айтты. Жамағатқа ізгілік, бірлік және адамгершілік құндылықтары жайында насихат жүргізді.
Кездесу соңында қатысушылар ҚМДБ Уағыз-насихат бөлімінің меңгерушісі Батыржан Берденұлына өз ризашылықтарын білдіріп, сапарының жемісті өтуіне тілектестік танытты.
