Сұрақ: Исламда адамның қадір-қасиеті қалай бағаланады?
Жауап: Алла Тағала адамды ақыл-парасатымен басқа жаратылыстан ерекше етіп жаратты. Исламадамдарды нәсіліне, этникалық тегіне, дініне, әлеуметтік мәртебесіне, жынысына немесе мүгедектігіне қарай кемсітушілікке жол бермейтін бейбіт дін. Яғни, Ислам адамды сүйікті жаратылыс ретінде ардақтап, оның абыройын, ар-намысын, өмірі мен жеке басының қауіпсіздігіне аса мән береді.
Қазіргі таңдағы Ислам атын жамылып, адамды намаз оқымаса «кәпір» деп, қыздардың ар-намысын таптап жүрген радикалды діни топтар дәстүрлі діннің санатынан емес. Мұндай діни топтар қоғамның тұрақтылығын бұзу үшін дінараздық алауыздық қоздыруды көздейді. Олардың арбауынан сақ болғанымыз дұрыс.
Дәстүрлі Исламда адамның ар-намысы, өмірі, ақылы, діні мен мүлкі қорғалуға тиіс негізгі құндылықтар ретінде қарастырған. «Исра» сүресінің 70-аятында: «Ақиқатында Біз адам баласын ардақты қылып, көптеген нығметке бөледік: оларға құрлықта да, теңізде де мініс көліктер нәсіп еттік. Таза әрі жағымды азықтарды ризық етіп бердік. Сондай-ақ оларды жаратқандарымыздың көбінен әлдеқайда үстем қылдық», деген.
Демек, Исламда адамның қадір-қасиеті оның әлеуметтік мәртебесімен, байлығымен немесе нәсілімен емес, адамгершілігімен, иманымен және көркем мінезімен өлшенеді.
Икрам АЙТАЕВ
