Сұрақ: Исламда жан тазалығының орны қандай?
Жауап: Исламда жан және тән тазалығы деген түсінік қалыптасқан. Адамның ішкі рухани күйі, көзге көрінбейтін маңызды ішкі әлемінің айнасы – жан тазалығы. Адам денесінің саулығы мен оның жасаған амалдарының дұрыс болуы жан тазалығына байланысты. Адамның жан дүниесі көреалмаушылық, менмендік, екіжүзділік сияқты рухани дерттерге шалдықса, сыртқы құлшылықтарынада әсер етеді.
Діни еңбектерде жанды тазартудың бірнеше жолы айтылған. Жасалған қате-кемшіліктері мен күнәлар үшін өкініп, Алладан кешірім сұрауы, зікір арқылы Алланы еске алу жанға тыныштық сыйлайтыны, кекшіл болмай кешірімді болуы, адамдарға жақсылық ойлауы, жақсы адамдармен дос болуы сынды дүниелер. Сонымен адам жақсы амалдар жасап, жаман күнәлардан бойын тыйғанда, жүрек жеңілдеп нұрланады екен.
«Бақара» сүресінің 222-аятында: «Шүбәсіз, Алла (пендешілікпен істелген күнәнің артынша) қатты өкініп тәубе ететін тәубешіл құлдарын және үнемі (күнә атты рухани кірлерден) тазаланушыларды жақсы көреді», – деген.
Пайғамбарымыздың (с.а.у.) «Тазалық – иманның жартысы», деген хадисі денені немесе киімді ғана емес, ең алдымен адамның ішкі жан-дүниесі мен жүрегінің тазалығын меңзеген. Адам баласының кемелдікке жетуі нәпсісін тыйып, жүрегін тазартудан басталады екен.
Икрам АЙТАЕВ
