Қазақстан – көпэтносты әрі көпконфессиялы мемлекет. Елімізде ислам, христиандық, иудаизм, буддизм және өзге де діни бағыттардың өкілдері тату-тәтті өмір сүріп келеді. Бұл – тарихи қалыптасқан өзара құрмет пен төзімділіктің нәтижесі.
Қазақстандағы дінаралық келісімнің негізінде ең алдымен рухани мәдениет пен дәстүр жатыр. Қазақ халқы ежелден өзге сенім иелеріне құрметпен қарап, «дін – жүрек ісі» деген қағиданы ұстанған. Сол себепті әртүрлі діни қауымдастықтар бір қоғамда үйлесімді өмір сүруде.
Тәуелсіздік жылдарында бұл бағыт мемлекеттік деңгейде де қолдау тапты. Елімізде діни бірлестіктердің қызметіне еркіндік беріліп, олардың өзара сұхбат алаңдары қалыптасты. Соның айқын көрінісі – Әлемдік және дәстүрлі діндер көшбасшыларының съезі. Бұл маңызды жиын Астана қаласында тұрақты түрде өткізіліп, әлемнің әр түкпірінен келген дін өкілдерін бір үстел басына жинап келеді. Мұнда бейбітшілік, төзімділік және адамзаттық құндылықтар кеңінен талқыланады.
Дінаралық татулықтың тағы бір маңызды қыры – күнделікті өмірдегі өзара сыйластық. Әртүрлі дін өкілдері бір-бірінің мерекелерін құрметтеп, қиындықта қолдау көрсетеді. Бұл қоғамдағы сенім мен тұрақтылықтың нығаюына ықпал етеді.
Сонымен қатар, Қазақстанда жастар арасында да толеранттылықты қалыптастыруға ерекше мән беріледі. Білім беру ұйымдарында діни сауаттылықты арттыру, экстремизмнің алдын алу бағытында түрлі жобалар жүзеге асырылуда. Бұл – болашақ ұрпақтың саналы әрі жауапты болып қалыптасуына жол ашады.
Қазақстандағы дінаралық достық – тек мемлекет саясатының нәтижесі ғана емес, халықтың ішкі мәдениеті мен рухани құндылықтарының көрінісі. Бұл тәжірибе әлемге үлгі боларлықтай. Ең бастысы – өзара құрмет пен түсіністік сақталған жерде бейбітшілік әрдайым салтанат құрады.
Е.Ерғалиұлы
