Қазіргі заманда өзге елдермен терезесі тең, тәуелсіз әрі дербес мемлекет болу – әрбір ұлттың маңдайына бұйыра бермейтін үлкен бақыт. Жер жүзінде халық саны қазақтан бірнеше есе көп болса да, тәуелсіздігін ала алмай, өзге елдің ықпалында өмір сүріп жатқан халықтар аз емес. Осындайда Асан Қайғының мына бір нақыл сөзі еріксіз еске түседі:
Ата жұрты бұқара,
Өз қолыңда болмаса,
Қанша жақсы болса да,
Қайратты туған ер ғаріп!
Отанға, туған жерге, елі мен халқына деген сүйіспеншілік – әрбір адам үшін қасиетті ұғым. Әркімнің өсіп-өнген жері – оның Отаны. Сондықтан туған жерді қастерлеу, оның қадірін білу – әр азаматтың парызы. Халық даналығында: «Отан қадіріне жетпеген өз қадіріне жетпейді» делінген. Демек, туған елге адал қызмет етіп, оның абыройын арттыру – әр адамның қасиетті борышы.
Ислам дінінде де отансүйгіштік ерекше орын алады. «Отанды сүю – иманнан» деген нақыл сөз халық арасында кең таралған. Пайғамбарымыз Мұхаммед ﷺ өзі туған Мекке қаласын ерекше жақсы көрген. Мәдинаға қоныс аударғаннан кейін де туған жерін сағынышпен еске алып отырған. Меккені азат еткен кезде ол қасиетті қалаға қарап: «Сен мен үшін сондай қымбатсың әрі сүйіктісің. Егер қауымым мені қуып шығармағанда, сенен басқа жерде тұрмас едім», – деген.
Сондай-ақ Алла Елшісі ﷺ Мәдина қаласының да берекелі әрі сүйікті мекенге айналуы үшін дұға жасаған. Бұл – туған жердің амандығы мен гүлденуін тілеудің мұсылман үшін маңызды іс екенін көрсетеді.
Шынайы отансүйгіштік – ұлтшылдық немесе рушылдық емес. Адам өз халқын, өз елін жақсы көруі керек, бірақ әділетсіздікке жол бермеуге тиіс. Пайғамбарымыз ﷺ да қауымының қателігіне қолдау көрсетуді емес, әділдікті жақтауды насихаттаған.
Отан – біздің отбасымыз, ата-анамыз, туған жеріміз, ауасын жұтып, суын ішіп жүрген қасиетті мекеніміз. Оның тыныштығы мен қауіпсіздігін сақтау – әрбір мұсылманның әрі азаматтың міндеті. Ислам діні адамдарды Отанын сүюге, оған адал болуға және қоғам игілігі үшін еңбек етуге үндейді.
Отанға деген сүйіспеншілік адамның іс-әрекетінен көрінеді. Саналы азамат өз елін жамандамайды, керісінше оның дамуына үлес қосады. Елдің тыныштығы мен болашағы үшін дұға етеді, халықтың бірлігі мен татулығын қолдайды. Мешіттерде жұма сайын еліміздің амандығы, халқымыздың бірлігі мен мемлекетіміздің қауіпсіздігі үшін дұға жасалуы да осының дәлелі.
Қоғамдағы ынтымақ пен бірлік – Отанның беріктігінің негізі. Халық арасында татулық пен бауырмалдықты насихаттау – сауапты іс. Себебі біз жақсылыққа шақырып, жамандықтан тыюды мақсат еткен үмбеттің ұрпағымыз.
Пайғамбарымыз ﷺ: «Адамдардың ең жақсысы – адамдарға көбірек пайдасы тигені», – деген. Сондықтан Отанын сүйетін әрбір азамат бұл сүйіспеншілігін нақты істерімен дәлелдеуі қажет. Мектеп, аурухана, жол, көпір салуға үлес қосу, мұқтаж жандарға көмектесу, қоғам игілігі үшін еңбек ету – туған елге қызмет етудің жарқын үлгілері.
«Ерім дейтін ел болмаса, елім дейтін ер қайдан шықсын» дейді халық даналығы. Сондықтан отаншыл, иманды, білімді әрі елжанды ұрпақ тәрбиелеу – баршамыздың ортақ міндетіміз. Отанды сүю – әрбір азаматтың қасиетті борышы әрі шынайы имандылықтың белгісі. Туған жердің тыныштығы мен гүлденуі үшін еңбек ету, халықтың бірлігі мен татулығын сақтау, ел игілігіне қызмет ету – әр адамның міндеті. Өз Отанын құрметтеп, оның дамуына үлес қосқан азамат қана елінің болашағына жанашыр бола алады. Сондықтан тәуелсіздіктің қадірін біліп, Отанымыздың өркендеуі жолында аянбай еңбек ету – баршамыздың ортақ парызымыз.
Мұхаммед Қанат, исламтанушы,
Қарағанды облысы
