Сұрақ: Жұма уақытының қасиеті қандай?
Жауап: Әр күнгі бес уақыт намаз сынды, аптаның бесінші күні жұма намазын оқу – парыз. Қасиетті айлар сияқты, жұма күнінің сәті де қасиетті. Жұманың уақытында дұға қабыл болатыны мен періштелердің болатындығы т.б. сынды қасиеттері мен хикметтері жайлы хадистерде кең баяндалған.
Жұма намазын ер азаматар оқиды. Оған балиғат жасына жеткен, ақыл-есі дұрыс, ер, азат, тұрақты тұрғын, жұма намазына баруға денсаулығы мен жағдайы мүмкіндік беретін адам барады. Ал, әйел адамға, балаларға, ақыл-есі дұрыс емес адамдарға, жолаушыларға, ауру адамға жұма намазы міндет емес.
Жұмаға ғұсыл, дәрет алып, жақсы иіссу сеуіп барғаны жақсы. Жұманың азаны айтылғаннан бастап, аяғына дейінгі уақытта шынайы ықыласпен құлшылыққа мән беру қайырлы іс.
Пайғамбарымыз (с.а.у.) хадисінде: «Жұма күні болғанда, мешіттің әрбір есігінде періштелер тұрып (намазға келгендерді) ретімен бір-бірлеп жазады, ал имам (мінберге) отырса, парақтарын жауып, зікір тыңдауға келеді», деген. Демек, шынайы ниетпен жұма намазға қатысып қайтуда мол сауап бар.
Икрам АЙТАЕВ
