Қызылорда облысы дін істері басқармасы дін мәселелерін зерттеу орталығының бөлім басшысы Асхат Ерубай Kazislam порталына берген сұхбатында еліміздің дін саласындағы ахуал, мемлекет пен діни бірлестіктер қатынасы, сондай-ақ қоғамда қордаланған кейбір мәселелер туралы айтып берді.
– Алдымен Қазақстандағы діни бірлестіктердің жалпы қызметі туралы айтып өтсеңіз.
– Қазақстанда діни бірлестіктер заң аясында жұмыс істейді және олардың қызметі азаматтардың ар-ождан бостандығын қамтамасыз етуге бағытталған. Негізгі құқықтық база – Қазақстан Республикасының «Діни қызмет және діни бірлестіктер туралы» заңы. Осы заң діни ұйымдардың тіркелуі, қызмет жүргізуі және қоғаммен өзара байланысын реттейді.
– Елімізде қанша діни бірлестік бар және олар қандай бағыттарды қамтиды?
– Қазақстанда үш мыңнан астам діни бірлестіктер тіркелген. Олардың қатарында ислам, православие, католицизм, протестанттық бағыттар, иудаизм және басқа да конфессиялар бар. Бұл – еліміздің көпконфессиялы сипатын көрсетеді. Әртүрлі сенім иелерінің бір қоғамда бейбіт өмір сүруі – Қазақстанның басты ерекшеліктерінің бірі.
– Діни бірлестіктердің қоғамдағы рөлі қандай?
– Олардың рөлі өте маңызды. Діни бірлестіктер тек құлшылық орындары ғана емес, сонымен қатар рухани тәрбие, қайырымдылық, әлеуметтік қолдау бағытында да белсенді қызмет атқарады. Олар адамдарды ізгілікке, сабырлылыққа, жауапкершілікке тәрбиелейді.
– Мемлекет пен діни ұйымдардың қарым-қатынасы қалай реттеледі?
– Қазақстан – зайырлы мемлекет. Бұл дегеніміз, мемлекет діннен бөлек, бірақ дінге қарсы емес. Мемлекет барлық конфессияларға тең мүмкіндік береді және олардың заң аясында еркін қызмет етуіне жағдай жасайды. Сонымен қатар, мемлекеттік органдар діни ахуалды бақылап, тұрақтылықты сақтауға күш салады. Бұл бағытта Қазақстан Республикасының Ақпарат және қоғамдық даму министрлігі маңызды рөл атқарады.
– Қазіргі таңда қандай мәселелер өзекті болып отыр?
– Басты мәселелердің бірі – діни сауаттылықтың жеткіліксіздігі. Кейбір азаматтар дінді үстірт түсініп, радикалды көзқарастарға бой алдыруы мүмкін. Сондықтан түсіндіру жұмыстары, білім беру, алдын алу шаралары өте маңызды.
– Жастар мен дін тақырыбына тоқталсақ…
– Жастар – ең маңызды аудитория. Олардың санасына дұрыс діни түсінік қалыптастыру қажет. Бұл ретте білім беру мекемелері, ата-аналар және дін қызметкерлері бірлесе жұмыс істеуі тиіс. Дін – бөлінудің емес, бірігудің құралы екенін жастар түсінуі керек.
– Дінаралық келісімді сақтау үшін не істеу керек деп ойлайсыз?
– Ең бастысы – өзара құрмет пен диалог. Қазақстанда бұл бағытта жақсы тәжірибе қалыптасқан. Мысалы, Әлемдік және дәстүрлі діндер көшбасшыларының съезі сияқты халықаралық алаңдар түрлі дін өкілдерінің ашық пікір алмасуына мүмкіндік береді.
– Сұхбатыңызға рақмет!
Әңгімелескен Е.Ерғалиұлы
