Сұрақ: Мешіт имамдарының қызметі қандай?
Жауап: Қазақстан Республикасында тіркелген діни бірлестіктердің бірі – Қазақстан мұсылмандары діни басқармасы. Басқармаға қарасты үш мыңға жуық мешіт бар.
Мешіттің қызметкері бас имам және олардың орынбасарлары наиб имам деп аталады. Имамдар арнаулы орта (медресе) және жоғары оқу орындарында исламтанушы, дінтанушы мамандықтарының негізінде қызмет атқарады. Имамдар күнделікті бес уақыт, жұма және айт намаздарын өткізеді. Жұма намазы мен діни мейрамдарда мұсылман қауымына Ислам мен дәстүрдің құндылықтарын насихаттайды. Сонымен қатар неке қию, нәрестеге азан шақырып ат қою, жаназа шығару сынды шараларды және ағартушылық, тәрбие, әлеуметтік, қоғамдық жұмыстарды да атқарады.
Сондай-ақ жат діни ағымдардың идеологиясына, түрлі теріс діни топтардың ықпалына қарсы насихат жүргізіп, халыққа дәстүрлі дін негіздерін, деструктивті діни ағымдардың шынайы бейнелерін айта отырып, дәстүрлі Ислам құндылықтарын түсіндіреді. Имамды тыңдаған адам жат діни ағымдардың жетегінде кетпейді. Демек, имам – халықтың рухани ұстазы, дұрыс жолға бағыт-бағдар беруші тұлға.
Икрам АЙТАЕВ
