Бұл туралы елордада Бас мүфти Наурызбай қажы Тағанұлының төрағалығымен өткен Қазақстан мұсылмандары діни басқармасының Төралқа мәжілісінде «Зекет және қайырымдылық» қорының директоры Мақсатбек Мақсотұлы хабарлады.
«ҚМДБ «Зекет және қайырымдылық» қорының 2026 жылғы республика бойынша Рамазан айындағы қайырымдылық жұмыстарының 10 күндік қорытындысы бойынша Республика көлемінде «Мұқтаждарға 35 мың азық-түлік себет» іс-шарасы аясында 8 261 мұқтаж жанға көмек көрсетілді, ал «Ел үлесі пәтерге» жобасы бойынша 7 баспана кілті табысталып, оның ішінде 6 баспана қызметтік пәтер, 1 баспана мұқтаждарға берілді.
«Жұмысшы мамандықтар» жылына орай еңбек адамдарына, соның ішінде көше мен аула тазалаушыларға арналған ауызашар себеттерін тарату акциясы бойынша 3 339 отбасы азық-түлікпен қамтылды. Сонымен қатар, «Рамазан тәттісі» атты акцияда 1 429 жетім балаға сыйлықтар берілді, ал «Бір күнде бір мұқтажға көмек» жобасы аясында жалғыз басты, қарттар және көпбалалы отбасылардан 367 мұқтаж адамға көмек көрсетілді.
Мешіттің дін қызметкерлері арасындағы көпбалалы отбасылардан 42 адамға арнайы тосын сый ұйымдастырылып, сыйлықтар берілді, сондай-ақ Мысыр және Түркия елдерінде оқып жатқан қазақстандық студенттерге ҚМДБ атынан 160 студентке ауызашар ұйымдастырылды. «Ораза ұстаған мүгедек жандарға, соқырлар қоғамына және басқа мүмкіндігі шектеулі жандарға, қарттар мен балалар үйлеріне ауызашар ұйымдастыру» жобасы аясында 905 адамға қолдау көрсетілсе, дін істері басқармасымен бірлесіп түзету мекемелеріндегі ораза ұстаушыларға 552 жанға ауызашар берілді. Сонымен қатар, университет пен колледж студенттеріне 4 365 ауызашар ұйымдастырылды»,- деді Мақсатбек Мақсотұлы.
