Сұрақ: Тағаттылық Ислам дініне қайшы ма?
Жауап: Тағаттылық, төзімділік ұстанымы Ислам дініне жат ұғым емес. Исламның басты талаптарының бірі – адамның намысына, мəдениетіне, ұлтына, дініне, ар-ожданына тіл тигізбеу. Ислам – тағылымы мол дін. Адамдардың жағымсыз мінезі мен іс-әрекеттері өзінің қасиетіне тән дүние. Әдетте мәселе дінде емес, адамда болады. Толеранттылық сөзінің ауқымы кең. Толеранттылық ағылшын тілінде басқаны қарсылықсыз қабылдауға қабілеттілік пен дайындықты білдірсе, француз тілінде басқаның бостандығын, оның ойлау мəнерін, жүріс-тұрысын, саяси жəне діни көзқарастарын құрметтеу дегенді аңғартады.
Толеранттылық шығыс елдерінде басқаға мейірімділік таныту, кешірімді болу, жанашырлық мағынасында қолданылады. Толеранттылықтың шығыстық түсінігі қазақ халқына да тəн. Қазіргі таңда толеранттылықтың синонимі ретінде төзімділік, тағаттылық сөзі қолданылып жүр.
Толеранттылық басқаның шектен шығуына үнемі төзу, бейжай қарау деген түсінікте болмау керек. Яғни, екі жақ та белгілі бір шектен аспауы керек. Толерантты болу – барлық адамдарға ортақ бір принциптерді басшылыққа алу, жүріс-тұрыста, көзқарасты байқатуда белгілі бір əдептілікті сақтау, адамдардың намысына, діни сенім бостандығы мен ар-ождан бостандығына нұқсан тигізбеу.
Толеранттылық сана мен мəдениет қазіргі Қазақстан қоғамы үшін маңызды əлеуметтік құндылық. Ұлттар мен дін өкілдерімен тату өмір сүру, дін мен заман талабы екендігін ұмытпағанымыз дұрыс.
Икрам АЙТАЕВ
