Сұрақ: Діни білім алушыларды қаржылай қолдау сауап па?
Жауап: Исламда білім алу парыз. Ислам – білімге аса мән берген дәстүрлі дін. Білімді адам қоғамға пайда әкеледі. Білімсіз, надан адам қоғамға кері әсерін тигізеді.
Діни білім алушыларды қаржылай, әлеуметтік тұрғыдан қолдау дұрыс әрі сауапты іс болып саналады. Діни сауаты бар, білімді мамандардың көптеп шығуы қоғамды түрлі кереғар, радикалды діни ағымдардан сақтайды. Рухани қажеттілік іздеген адамдар шетелдік жалған шейхтарға еліктемейді. Сонымен ілім алып жатқан адамға жәрдемдесуші, білім үйренуші адамның сауабындай сауап алады.
Ал, қаржылай көмектесемін деп жалған медресе атын жамылғандарды немесе бейресми шетелді діни білім алушыларды қолдау дұрыс амалдардан емес. Ондай санаттағы білім алушы азаматтар түрлі жат діни ағымға бейім болады.
Қазақстанда ресми тоғыз медресе-колледж бен «Нұр-Мүбарак» университеті сияқты заңды отандық діни оқу орындарында оқитын жастарға демеушілер, қайырымдылық қорлары қаржылай және материалдық көмек көрсету – құпталған іс. Пайғамбарымыз (с.а.у.) хадисінде: «Кімде-кім бір жақсылыққа нұсқайтын болса, тура сол жақсылықты жасаушы адамның сауабындай сауапқа кенеледі», деген. Демек, елге пайдасы бар білім алушыларды қолдау сауапты амал екен.
Икрам АЙТАЕВ
