Сұрақ: Дін үйренуде нені ескерген жөн?
Жауап: Ислам – қазақтың салт-дәстүрімен сабақтасып, халықтың рухани өмірінен орын тапқан дін. Оны үйренудің өзіндік қалыптасқан тәртіптері бар. Қазіргі қоғамда дінді үйренген кезде нені үйрену керегін ғана емес, неден сақ болу керектігі мен салдарын да білу қажет. Кейде дұрыс ниетпен басталған білімнің өзі қате ақпараттардың әсерінен адастыруы мүмкін.
Үйренуші адам мына дүниелерге мән бергені дұрыс: дінді кез келген адамнан үйренбеу керек, интернеттегі түрлі діни уағызшыларға сене бермеуі, діни ұстанымы белгісіз адамнан сақ болу, Құран аяттары мен хадистерді өз бетінше пайымдамау, сенімді, білікті ұстаздардан үйрену, басқа адамның иманына баға бермеу, күнә істеді деп адамды діннен бездірмеу, ата-ана, ағайын туыстардың алдындағы міндеттерді ұмытпау, дін үшін өзіңді өзгеден жоғары санамау, дінді шамадан тыс ауырлатпау, үміт пен үрейді дұрыс пайымдау, ақида, фиқһ, құран, сүннет, сира сынды пәндерді дұрыс дереккөздерден үйрену, дінді ақша мен билік құралына айналдыратындардан алыс болу, біліммен бірге мінезді де тәрбиелеу қажеттігіне мән беру т.б.
«Нахыл» сүресінің 43-аятында: «Егер өздерің білмесеңдер, шынайы ілім иелерінен сұраңдар!» деген. Діни ілімді отандық оқу орындарынан үйреніп, сенімді дереккөздерге жүгіну заман талабы.
Икрам АЙТАЕВ










