Дрондар Мәдина қаласы маңында және елдің шығыс бөлігінде жойылған. Йеменнің заңды үкіметін қолдайтын Сауд Арабиясы бастаған араб коалициясы Мәдина қаласы маңында және Сауд Арабиясының шығыс бөлігінде бес ұшқышсыз ұшу аппаратын (ҰҰА) ұстап, жойғанын мәлімдеді.
Араб коалициясының ресми өкілі, генерал-майор Түрки әл-Малики америкалық компанияға тиесілі X әлеуметтік желісіндегі парақшасында Сауд Арабиясына дрондармен шабуыл жасалғанын хабарлады.
Оның айтуынша, коалиция күштері бес ұшқышсыз ұшу аппаратын анықтап, ұстап, жойған. Әл-Малики дрондардың Мәдина қаласы маңында және елдің шығыс бөлігінде атып түсірілгенін нақтылады.
Алайда коалиция өкілі ұшқышсыз ұшу аппараттарының қай жерден ұшырылғанын, сондай-ақ оқиға салдарынан адам шығыны немесе қирау болған-болмағанын хабарлаған жоқ.
Йеменде азаматтық соғыс жалғасып жатыр. Қақтығыс 2014 жылғы қыркүйекте Иран қолдайтын хуситтер ел астанасы Сана мен бірқатар провинцияны бақылауына алғаннан кейін басталған.
Сауд Арабиясы бастаған араб коалициясы 2015 жылғы наурыздан бері халықаралық қоғамдастық мойындаған Йемен үкіметіне қолдау көрсетіп келеді.
Соңғы уақытта Йеменде үкіметтік күштер мен хуситтер арасындағы қақтығыстар жиілеген. Иран қолдайтын хуситтер өздеріне қарсы шабуылдар жасалып жатқанын мәлімдей отырып, Сауд Арабиясына баллистикалық зымырандар мен ұшқышсыз ұшу аппараттары арқылы соққы беріп келеді.
