Йемен армиясы хуситтерге қарсы 1208 операция жүргізіп, 370 содырдың көзін жойды. Бұл туралы Анадолу агенттігі хабарлады.
Үкімет әскерінің мәліметінше, түрлі майданда хуситтердің 120-ға жуық әскери техникасы мен жабдығы жойылған немесе істен шығарылған.
Йемен армиясы Иран қолдайтын хуситтерге қарсы 1208 әскери операция жүргізген. Нәтижесінде дала командирлерін қоса алғанда, 370 содырдың көзі жойылған.
Армияның жазбаша мәлімдемесінде «Йемен таңы» («Рассвет Йемена») операциясы аясында хуситтерге қарсы жүргізілген әскери іс-қимылдар туралы ақпарат берілген.
Мәліметке сәйкес, әскери авиация, ұшқышсыз ұшу аппараттары (ҰҰА), далалық артиллерия және дүркіндете ататын реактивті жүйелер қолданылған. Хуситтердің позицияларына, шоғырланған аудандарына, қозғалыс бағыттарына, қосымша күштеріне, бекіністері мен атыс нүктелеріне барлығы 1208 соққы жасалған.
Операциялар нәтижесінде дала командирлері мен содырларды қоса алғанда, шамамен 370 адам залалсыздандырылған. Сонымен қатар түрлі майданда хуситтердің 120-ға жуық әскери техникасы мен жабдығы жойылған немесе істен шығарылған.
Мәлімдемеде үкімет әскерлері мен халықтық қарсылық күштері елдің оңтүстік-батысындағы Таиз қаласында бірқатар стратегиялық нысанды бақылауына алғаны да айтылған. Хуситтердің аталған аумақтарды қайтарып алу әрекеттеріне тойтарыс берілген.
Армия өкілдері мемлекеттік мекемелерге бақылау орнатып, хуситтер тарапынан төнетін қауіп-қатерді жойғанға дейін әскери операциялар табанды түрде жалғасатынын атап өтті.
Йемен армиясы операциялардың нақты қай мерзімде жүргізілгенін жариялаған жоқ. Ал хуситтер әзірге бұл мәлімдемеге қатысты пікір білдірмеді.
Йемен Президенттік басқару кеңесінің төрағасы Рашад әл-Алими 5 қазанда мемлекеттік мекемелерге бақылауды қайтаруға және ел астанасы Сана қаласын бақылауға алуға бағытталған «Йемен таңы» әскери операциясының басталғанын жариялаған болатын.
Біріккен Ұлттар Ұйымының (БҰҰ) мәліметінше, шілде айында қайта өршіген қақтығыстар салдарынан мыңдаған адам қаза тауып, жараланған. Сонымен қатар 250 мыңнан астам бейбіт тұрғын тұрғылықты мекенін тастап кетуге мәжбүр болған.
Йемен 2014 жылдың қыркүйегінен бері азаматтық соғыс жағдайында қалып отыр. Сол кезде хуситтер ел астанасы Сананы және бірқатар провинцияны басып алған еді.
2015 жылдың наурызынан бастап Сауд Арабиясы бастаған коалициялық күштер халықаралық деңгейде мойындалған Йемен үкіметіне қолдау көрсетіп келеді.
