Қазақстан – сан түрлі этнос пен мәдениет тоғысқан, бейбітшілік пен келісімді ту еткен мемлекет. Тәуелсіздік жылдарында еліміз тек экономикалық немесе саяси бағытта ғана емес, рухани және қоғамдық келісім тұрғысынан да айрықша үлгі қалыптастырды. Соның ең маңызды көріністерінің бірі – дінаралық татулық пен өзара құрметке негізделген қоғамның орнығуы.
Елімізде ислам, христиандық, иудаизм, буддизм және өзге де діни ағым өкілдері бір шаңырақ астында тату-тәтті өмір сүріп келеді. Бұл – Қазақстанның басты құндылықтарының бірі. Мемлекет әр азаматтың ар-ождан бостандығына кепілдік бере отырып, діндер арасындағы диалог пен ынтымақтастықты дамытуға ерекше мән береді. Осы арқылы қоғамда төзімділік, өзара түсіністік және сыйластық мәдениеті қалыптасып отыр.
Қазақстан әлемдік деңгейде де дінаралық келісімді нығайтуға белсенді атсалысып келеді. Астанада тұрақты түрде өтетін Әлемдік және дәстүрлі діндер көшбасшыларының съезі – соның айқын дәлелі. Бұл алаң түрлі дін өкілдерін бір үстел басына жинап, бейбітшілік пен келісімнің ортақ құндылықтарын талқылауға мүмкіндік береді. Мұндай бастамалар еліміздің халықаралық беделін арттырып, оны рухани келісімнің орталығына айналдырды.
Дінаралық татулық – кездейсоқ қалыптасқан құбылыс емес, ол – саналы саясат пен қоғамның ортақ жауапкершілігінің нәтижесі. Қазақстанда дін – бөлінудің емес, бірігудің құралы ретінде қарастырылады. Әрбір азаматтың сенімі құрметтеліп, ешкімнің діни көзқарасына шектеу қойылмайды.
Қазақстан – дінаралық достықтың жарқын үлгісін көрсетіп отырған ел. Бұл тәжірибе бейбітшілік пен тұрақтылықты сақтау жолында маңызды рөл атқарады. Осындай бірлік пен келісімнің арқасында еліміз болашаққа нық қадам басып, рухани құндылықтарды сақтай отырып дамуын жалғастыра бермек.
Жасұлан БАҚЫТБЕК
