Сұрақ: Ақ күндері ұсталатын үш күндік оразаның Рамазан оразасына қатысы бар ма?
Жауап: Исламның бес парызының бірі – Рамазан айында ораза ұстау. «Үш күн ораза ұстау» ұғымы Рамазан оразасынан бөлек қосымша нәпіл оразасы ретінде басқа күндері орындалады. Рамазан оразасын үш күндік т.б. деп шатастырып алмағанымыз абзал.
Рамазан айынан тыс уақыттары, ай сайын ақ күндері үш күн нәпіл оразасын Алладан сауап үміт етіп ұстау сүннет амалдарында бар. Ақ күндері дегеніміз – ай толып, он үшінші тәулікке жеткенде түн өте жарық болады. Міне сол он үшінші және одан кейінгі он төртінші, он бесінші түндер ақ түндер делінеді. Сол мезгілдегі түндердің күндізгі уақыттарында нәпіл оразасы ұсталады.
Пайғамбарымыз (с.а.у.) хадисінде: «Ақ түндердің он үш, он төрт және он бесінің оразасын тұтуды бұйыратын және: «Олар тура жыл бойына ұқсайтын» деді. Рамазан айының парыз оразасын басқа айларда орындалатын қосымша (нәпіл) оразаларымен шатастырмау керек.
Икрам АЙТАЕВ
