Қазақстан мұсылмандары діни басқармасы Төрағасы, Бас мүфти Наурызбай қажы Тағанұлының бастамасымен Рамазан айында «Уақып» корпоративтік қайырымдылық қоры тарапынан бірқатар әлеуметтік және рухани бағыттағы іс-шаралар жүзеге асырылды.
Атап айтқанда, Солтүстік Қазақстан облысы бойынша «Уақып» қорының ұйымдастыруымен Мысыр Араб Республикасында білім алып жатқан 230 қазақстандық студентке ауызашар дастарханы жайылды.
Атырау облысында «Парасат» мешіті жанынан мешіт азаншысы Аманат Қанатқалиұлына қызметтік пәтер уақып етілді. Сонымен қатар Астана қаласындағы «Астана» медресе-колледжінде білім алып жүрген шәкірттерге ауызашарға тәтті тағамдар жеткізіліп, «Хусамуддин ас-Сығанақи» ислам институтында ілім алып жатқан студенттерге азық-түлік таратылды.
«Уақып» қорын қолдау аясында еліміздің рухани дамуына үлес қосып жүрген 6 кәсіпкерге арнайы «Уақыпнама» табысталды.
Елорда мешіттеріне, «Астана» медресесіне және «Хусамуддин ас-Сығанақи» ислам институтына, сондай-ақ ауызашарға жиналған жамағатқа жалпы көлемі 3 тонна құрма үлестірілді.
Республика бойынша жамағатқа арналған ораза кестелері мен «Қадір түнінің қасиеті» тақырыбындағы 40 000 дана ақпараттық парақшалар таратылды.
Сонымен қатар «Уақып» қорының жұмыс жоспары аясында ақпараттық-насихат бағытында өңірлермен 20 тікелей эфир ұйымдастырылып, әлеуметтік желілерде 29 күнге арналған амалдар бойынша фотоматериалдар мен 25 бейнеролик тұрақты түрде жарияланды.
Жалпы алғанда, атқарылған жұмыстар қайырымдылық мәдениетін дамытуға, діни білім мен рухани құндылықтарды насихаттауға және қоғамдағы әлеуметтік қолдауды күшейтуге бағытталды.
