Сұрақ: Өзге діндегілерге жақсылық жасауға бола ма?
Жауап: Елімізде ұлттар мен діндер тұрақтылықты сақтап, бейбіт қарым-қатынаста өмір сүреді. Ислам бейбітшілігімен, татулығымен халықтың рухани өмірінен орын тапқан. Ислам дінінде өзге ұлтты, өзге дінді қорлауға, кемсітуге тыйым салады. Ислам тарихында өзге дінге зұлымдық жасады деген деректер кездеспейді. Барынша адамға оның дініне қарамай әділдікпен және ізгілікпен қарым-қатынас жасауға бұйырады.
Ислам тағылымы дініне қарамай мұқтаж адамға көмектесуге, көршімен жақсы қарым-қатынас жасауға, сырқаты болса көңілін сұрауға, қиындықта қолдау көрсетуге, әділ әрі сыпайы болу сынды жақсы амалдар жасауға шақырады.
Ал, радикалды діни топтардың өзге мұсылман емес ұлттар мен діндерді жек көру керек деген ұрандары – адасушылық. Діни ағымдардың мақсаты – дінараздық алауыздық отын тұтату. Ондай бүлікші діни топтардан сақ болғанымыз абзал.
«Мумтахана» сүресінің 8-аятында: «Алла сендерді өздеріңмен дін үшін соғыспаған және өз атамекендеріңнен қумағандарға жақсылық жасаудан һәм оларға барынша әділ болудан тыймайды» деген.
Демек, дәстүрлі Ислам өзге діндегілерге жақсылық жасаудан қайтармайды екен.
Икрам АЙТАЕВ
