Сұрақ: Дінді бұрмалаудың салдары не болмақ?
Жауап: Ислам – халықтың рухани өмірінен орын тауып, салт-дәстүрмен сабақтасқан дәстүрлі дін. Тарихта дінді бұрмалап, лаң саламыз деп шыққан діни ағымдар көп болған. Діни ағымдардың іс-әрекеттеріне дін саласындағы ғалымдар дер кезінде тосқауыл қойып отырған. Ғалымдардың болуы өркениеттік дамуға себепші. Ал, Ислам атын жамылған діни ағымдар діннің негізгі ережелерін, Құран мен хадисте келетін мәтіндерін немесе мағынасын қате түрде өзгертіп, адамдарға негізгі мағынасынан басқа түсініктерін тықпалап жатады.
Діни бүлік салуға негізделген деструктивті ағымдардың өз ойларын «шариғаттың нақты талабы» ретінде көрсетуі, жиһад, тағұт, куфр, шаһид сынды діни мәтінді контекстінен жұлып алып, басқа мағынада түсіндіруі, дінде кездеспеген нәрсені дін атынан міндеттеуі, діндегі белгілі бір ұғымды әдейі өзгертіп түсіндіруі оларға тән қасиет.
Демек, дінді бұрмалап, теріс мақсатта пайдалану, қоғамның діни тұрақтылығына қатер төндіріп, экстремизм мен радикализмге жол ашады.
«Хужурат» сүресінің 6-аятында: «Уа, иман келтіргендер! Егер жолынан тайған пасық адам сендерге бір хабар әкелсе, әуелі анық-қанығына жетіңдер, әйтпесе білмей тұрып, абайсызда бір елге кесірлерің тиіп кетеді де кейін істегендеріңе өкінесіңдер», деген.
Діндегі бұрмаланған дүниелерден сақтанып, ҚМДБ ұсынған діни ақпараттарға жүгіну абзал.
Икрам АЙТАЕВ
