Сұрақ: Әлеуметтік желіде біреудің айыбын ашу күнә ма?
Жауап: Адам Ислам дінінің мәнін түсінсе, барынша жаман қасиеттерден алыс болуға әрекет етеді. Жақсылық етіп, адамдардың ризалығын алу – ақылдылық пен парасаттылық жемісі. Ал, кек сақтап немесе көре алмашылықпен біреудің айыбын ашып немесе намысына тиетін сөз айтып рахатқа бөленетіндер қоғамда жоқ емес. Мұндай қасиеттер кейінгі толқынға дұрыс үлгі болмайтыны белгілі.
Қоғамға немесе адамға қаупі бар жандардың айыбын ашу күнә санатына жатпайды. Ал, нәпсіге ерік беріп немесе тәкаппарлыққа бой алдырып біреудің айыбын ашып, мысқылдап мазақ ету Исламның құптаған амалдарынан емес.
Пайғамбарымыз (с.а.у.): «Кім бұл дүниеде мұсылманның қайғысын сейілтсе, Алла Қияметте оның қайғысын сейілтеді. Кім қиындыққа тап болғанның жағдайын жеңілдетсе, Алла оның ісін осы дүниеде және арғы дүниеде жеңілдетеді. Кім мұсылманның кемшілігін жасырса, Алла оның кемшіліктерін екі дүниеде де жасырады. Адам мұсылман бауырына көмегін тоқтатпайынша, Алла да оған жәрдемін тоқтатпайды», деген.
Сонымен, біреудің айыбын ашқанша, жақсылық істеп Алланың ризалығына бөлену саналы адамның ісі болуы керек.
Икрам АЙТАЕВ
