Сұрақ: Ағаш отырғызудың сауабы қандай?
Жауап: Ислам діні тек құлшылық етумен шектелмейді. Қоғамға, табиғатқа пайда әкелетін істерді құптайды. Адамзатқа пайда әкелетін амалдар Исламда құпталған, Алланың ризалығына бөлейтін қайырлы істерден.
Қайырлы істердің бірі – ағашты кесу емес, ағашты отырғызу. Исламтанушы ғалымдар, отырғызған ағаш жылдар бойы жемісін берсе, көлеңке түсірсе немесе тіршілік иелеріне пайдасын тигізсе, табиғатқа ұзақ уақыт бойы пайдасы тиіп тұрса, сауабы бар деген.
Ислам діні ағаш отырғызуды, қоршаған ортаны таза ұстауды бұйырады. Пайғамбарымыз (с.а.у.) хадисінде: «Бір мұсылман бір ағаш отырғызса немесе бір нәрсе ексе, одан адам, жануар не құс жесе, ол үшін садақа болып жазылады», десе, тағы бір хадисінде: «Жеті түрлі амалдың сауабы пенде дүниеден өткеннен кейін қабіріне барып тұрады. Біреуге ілім үйретсе, құдық қазса, құрма немесе басқа да ағаштар ексе, мешіт салса, Құран кітабын мирас етіп қалдырса және қайтыс болғаннан кейін артынан оған жарылқау тілейтін ұрпақ қалдырса», деген.
Демек, пайдасы бар ағаш отырғызу адамға дүниеден өткеннен кейін де барып тұратынын ерекше сауап түрі екен.
Икрам АЙТАЕВ
