Сұрақ: Сауапты амал деген не?
Жауап: Жаман амалдар жақсы амалдармен тең болмайды. Жақсы амалдардың орны бөлек. Құран аяттары мен хадистерде ізгі амалдарды жасауда мол сауаптар бар екендігі айтылған. Сондай-ақ, ізгі амал жасаудың мұсылман өмірінде маңызды екендігін аңғаруға болады.
Алла ризалығы үшін жасалған әрбір ізгі амал мен берілген садақа, зекет сынды дүниелерде қайыр бар. Адам ізгі-амалдарын істеу арқылы кемелдік пен жақсылыққа жетеді.
Ізгі амалдардың түрлері діни еңбектерде тізбектеп келтірілген. Оның негізгілері бұйырылған парыз амалдарын орындау, ата-анасы мен жақын туыстарына жақсылық жасау мен туыстық қатынастарын үзбеу, үздіксіз сауап әкелетін пайдалы білім үйрету, садақа жасау, артынан дұға ететін салихалы ұрпақ тәрбиелеу, қоғам мен адамдарға пайдалы іс жасау, сауабын үміт етіп өзгелерге жәрдемдесу мен қажеттілігін өтеу, кешірімді болу, адамдарға жылы сөз айту және әрқашан жақсы ниетте болу т.б.
«Кәһф» сүресінің 30-аятында: «Ал енді иман келтіріп, игі іс істейтіндерге келсек, Біз игі істер істейтіндердің сауабын әсте зая етпейміз», – деген.
Пайғамбарымыздың (с.а.у.) хадистерінде: «Алланың разылығы – ата-ананың разылығында, Алланың ашуы – ата-ананың ашуында», «Адамдардың жақсысы – (өзге) адамдарға көбірек пайда тигізгендері», деген.
Демек, шамаң келсе жақсылықты өзіңнен бастап, өзгеге жасау сауапты амалдардан екен.
Икрам АЙТАЕВ
