Сұрақ: Жамандыққа себепші болу күнә ма?
Жауап: Исламда жақсылықтың қарымтасы – жақсылық. Ал, адамның жамандыққа себепші болуы – үлкен күнәлардың бірі. Жамандық – біреуді күнә істеуге үгіттеу немесе күнә жасауға жағдай жасап беру, арам істі насихаттау, сананы улайтын азғындыққа жетелейтін әрекеттерді тарату т.б. әрекеттер.
Дінімізде жақсылыққа шақырып, жамандықтан қайтару қағидасы бар. Жамандықтан қайтарудың өзіндік әдебі бар. Ислам дінінде жақсылыққа себепші болған адам сауапқа бөленеді. Жамандыққа себепші болған адам сол істің күнәсіне ортақ болып, күнә арқалайды. Ал, адамдарды жақсылыққа, құлшылыққа, білімге немесе игі іске шақырса, соған ергендердің сауабынан үлес алады. Яғни Ислам тағылымы бойынша, басқа біреудің күнә жасауына себепші болған адам oл кісінің жасаған әрбір жамандығы үшін күнә арқалайды екен.
Пайғамбарымыз (с.а.у.) хадисінде: «Кім тура жолға шақырса, оған сол жолмен жүргендердің сауабындай сауап жазылады, ал олардың сауабы кемімейді. Кім адасушылыққа шақырса, оған сол жолмен жүргендердің күнәсіндей күнә жазылады, ал олардың күнәсі кемімейді», деген.
Демек, жамандықтан сақтанып, жақсылық іске себепші болуда қайыр-сауап бар екен.
Икрам АЙТАЕВ
