Сұрақ: Екі айт мерекесінің ерекшелігі қандай?
Жауап: Һижри жылының қасиетті Рамазан мен Зул-хиджа айлары бар. Рамазан айының бітуімен ертесі ораза айт күні. Зул-хиджа айының оныншы күні Құрбан айт басталып, үш күнге созылады.
Барша мұсылмандар үшін екі айт мереке күндерінің орны ерекше. Мұсылмандар отыз күн оразасын ұстап, ертесі күні ораза айтын мерекелейді. Бұл күні айт намазы оқылып, пітір садақаларын беріп, кейіннен бір-бірінің үйіне қонаққа барып, тәттілер үлестіреді.
Арада жетпіс күн уақыт өткеннен кейін Зул-хиджа айының оныншы күні Құрбан айт басталады. Бұл күні де айт намазы оқылады. Құрбан айт күндері үш күнге жалғасады. Бұл күндері қажылар қасиетті Меккеде қажылық рәсімдерін орындайды. Сондай-ақ, шамасы келгендер қой, ешкі, сиыр, түйелерін құрбандыққа сояды. Құрбандық еттерін бөліктерге бөліп, өз отбасыларына, мұқтажтарға, көршілеріне т.б. таратады.
Сонымен екі айт күндерін құлшылықпен, қуанышпен және адамдарға жақсылық жасап өткізу құпталған амалдардан. Тәуелсіз елімізде тойланатын діни және басқа да мерекелерге құрметпен қарау – саналы амадға міндет.
Икрам АЙТАЕВ
