Осы жылдың 27-29 мамыр аралығында елімізде Құрбан айт мерекесіне орай Қазақстан мұсылмандары діни басқармасы «Qurban 2026» республикалық қайырымдылық акциясын ұйымдастырды.
ҚМДБ Төрағасы, Бас мүфти Наурызбай қажы Тағанұлының бастамасымен құрылған арнайы республикалық штаб құрбан шалу рәсімдерін жүйелі түрде үйлестіріп, бүкіл ел бойынша ауқымды қайырымдылық жұмыстарын атқарды.
Азаматтар құрбандық шалу үшін QURBAN.MUFTYAT.KZ сайты арқылы онлайн тапсырыс беріп, сонымен қатар жергілікті қасапханаларда офлайн түрде де құрбан шалуға мүмкіндік алды.
Құрбандық шалу барысында республика көлемінде жалпы саны 20 449 мал құрбандыққа шалынды. Атап айтқанда, 17 781 бас қой, 1 358 бас ешкі, 1 283 ірі қара және 27 түйе құрбандыққа шалынды. Құрбандық еттері арнайы қабылдау пункттеріне жиналып, дін қызметкерлері мен еріктілердің қатысуымен мұқтаж жандарға үлестірілді.
Қорыта айтсақ, еліміз бойынша Құрбан айт күндері QURBAN.MUFTYAT.KZ сайтына 1 799 тапсырыс берілді. Республика бойынша 809 адамнан құралған бірнеше штаб үздіксіз жұмыс атқарды.
Нәтижесінде 66 905 отбасыға құрбандық еті жеткізіліп берілді. Бұған қоса, арнайы сойылған малдың еттері еліміздегі 2019 әлеуметтік мекемеге – мүмкіндігі шектеулі жандар қорларына, зағиптар қоғамына, ауруханалар мен қарттар үйлеріне таратылды.
