Таяуда бір ғалымның мына сөздерін естіп, қайран қалдым. Расында да, ойланатын мәселе екен.
Әлгі ғалым өз сөзінде: «Адам баласы дүниеге келгенде ең негізгі үш куәлігі ғана болады. Біріншісі – дүниеге келу туралы куәлігі. Екіншісі – отбасын құру, үйлену туралы куәлігі. Үшіншісі – дүниеден озғанын, өлгенін анықтайтын куәлік. Білген адам үшін, соның ішінде ең маңыздысы, ең ардақтысы – үйлену туралы куәлігі. Көбінен сол куәлігі жайлы сұрасаң, оның сандық түбінде, не сейфінде жатқанын айтады. Ал, қандай да бір жанұяның сақталуы үшін ең маңызды құжат жұбайлардың жатын бөлмесінде немесе төрінде ілініп тұруы керек қой.
Әлбетте, құжаттың өзін ілмесеңіз де, көшірмесін үлкейтіп, әдемі етіп, фото жиектемеге салып, іліп қойса болады ғой? Ең әуелі жұбайлардың өздері, кейін балалары да көрген сайын жауапкершілікті сезініп, отбасының одан әрі бекем болуына бірден-бір себеп болары сөзсіз. Отбасының ажырасуы көбейген осы заманда өте жақсы өнеге болар еді», деп сөзін аяқтады.
Діні мен дәстүрін қадір тұтқан халқымыз да «Отан – отбасынан басталады» деп, отбасының қоғамдағы орнын ерекше бағалаған. Отбасының ортасында сүйіспеншілік пен татулық, береке-бірлік салтанат құрғанда ғана ел болашағының баянды болары айқын.
Алла әрбір отбасының береке-бірлігі шайқалмай, бақытты өмір сүрулеріне жазсын!
Қуат ҚАБДОЛДА
