Сұрақ: Шұлыққа мәсіх тартуға бола ма?
Жауап: Аяқты жуу – дәреттің төрт парызының бірі. Пайғамбарымыздың (с.а.у.) кезінде теріден жасалған мәсіге мәсіх тартуға болатынын бұйырған. Мәсі аяқ жуылғаннан кейін киіледі. Киілген мәсіге мәсіх тарту уақыты – тұрғынға 24 сағат, жолаушыға – үш күнге дейін. Яғни, мәсісі болса, аяқты жуудың орнына мәсісінің үстіне мәсіх тартады.
Мәсіхті саусақтарын ашық ұстап, аяқ саусақтарынан жоғары қарай қонышына дейін тарту – сүннет.
Қазіргі таңда жалған сәлафиттік ұстанымдағы азаматтар күндегі қолданыстағы шұлыққа (нәскиге) мәсіх тартуға болады деген пәтуаларымен адастырып жүр. Мұндай пәтуалардан сақ болғанымыз абзал.
Төрт мәзһаб ғалымдарының ұстанымы мәсі теріден болуы мен қосымша шарттарын айтқан. Дәрет, ғұсыл, таяммум т.б. мәселелерде ҚМДБ-нің ресми сайттарына жүгінгеніміз абзал.
Пайғамбарымыз (с.а.у.) хадисінде: «Алла Елшісі мәсіге мәсіх етті. Оң қолын оң мәсісінің үстіне, сол қолын сол мәсісінің үстіне қойып, жоғары қарай бір рет мәсіх тартты» деген. Дәретті толық алып, құлшылыққа берік болайық.
Икрам АЙТАЕВ
