Сұрақ: Дәрет аларда қандай мәкрүһ амалдарға жол бермеу керек?
Жауап: Ислам діні тазалыққа аса мән береді. Құлшылықтың дұрыс болуы – ниет пен дәреттің дұрыс болуына байланысты.
Шариғатта дәрет аларда біраз мәселелер айтылған. Дәреттің сүнттерін, парыздарын, әдептерін, мәкрүһтерін білген жөн. Ислам құқық кітаптарында дәрет алу мәселесі кең баяндалған. «Мәкрүһ» сөзі ұнамсыз, жағымсыз нәрселер деген мағынада.
Мынадай дәреттің мәкрүһтерінен сақтанған абзал: нәжіс немесе лас жерде дәрет алу, дәрет алу кезінде орынсыз сөйлеу, суды бетке немесе басқа мүшелерге шашыратып жуу, аяқтарды жуғанда құбылаға қарай созу, дәрет алғанда әурет жерлерін ашу, дәрет алатын суға үрлеу, дәрет алатын суға немесе шылапшынға түкіру немесе сіңбіру, суды ысырап ету, құбылаға теріс қарап отыру, сәлем беру, т.б.
Пайғамбарымыз (с.а.у.) хадисінде: «Намаздың кілті – тазалық, оны (намазды) қасиетті құлшылыққа айналдыратын нәрсе – такбир, ал одан шығаратын нәрсе – сәлем», десе, тағы бір хадисінде: «Тазалық – иманның жартысы», деген.
Демек, намаздың дұрыс болуы үшін, дәрет алуда мәкрүһ амалдардан сақтанып, денеміз, киіміміз және намаз оқитын жеріміз нәжістен таза болуы керек екен.
Икрам АЙТАЕВ
