Сұрақ: Ислам жүректің тазалығы туралы не айтады?
Жауап: Исламда жүректің таза болуы, ішкі ниеттің күйі де үлкен мәнге ие. Ислам діні – тілі мен ділі, дәстүрі мен танымы әртүрлі ұлттар мен ұлыстарды бөле-жармай адами құндылықтар төңірегіне ұйыстырады.
Жүректі тазарту жолдарына Алланы жиі еске алу, Құран оқу, шынайы тәубе ету, адалдық пен әділдікті ұстану, жақсылық жасау және адамдарға зиян келтірмеу, жақындармен қарым-қатынасты үзбеу, нәпсіні тәрбиелеу және жаман мінездерден арылу т.б. жатады.
Ал, шынайы Исламның тағылымын білмей, қазіргі таңда оны фанатизм мен қатаң талаптар жүйесі деп қарайтын түсініктер де жиі кездеседі. Нәтижесінде Ислам атын жамылған радикалды діни топтардың мінездерімен шатастырады. Олардың діни радикалды көзқарастарында діни негіз жоқ. Ислам тек сенім жүйесі емес, қарым-қатынас әдебі, моральдық нормалар жиынтығы, жақсы мен жаманды, адал мен арамды ажыратушы рухани қағидалар жүйесі.
Исламды руханият негізі ретінде қарап, салт-дәстүрмен сабақтасқан құндылықтарын, рухани мәнін басты назарға алғанымыз жөн.
Адам құндылықтардың ең жоғары дәрежесіне таза жүрек пен ниет арқылы жетеді. Пайғамбарымыздың (с.а.у.) хадисінде: «Адамның денесінде бір бөлшек ет бар, егер ол ет таза, жақсы болса, ол адамның амалдары да жақсы, егер ол ет лас болса, оның амалдары да жаман болады. Ол – жүрек», – деген.
Демек, шынайы иман мен ықылас дұрыс амалдарға жетелеп, жүректің тазалығын нығайтады екен.
Икрам АЙТАЕВ
