Сұрақ: Ниет етудің маңызы қандай?
Жауап: Ниет – адамның іс-әрекетінің нақты мақсатын айқындайды. Орындалған әр амалдың өзіндік мақсаты болады. Алланың разылығы үшін орындалатын құлшылық ғибадаттарының дұрыс болуы ниетке байланысты. Ислам парыздарындағы намаз, ораза, қажылық, зекет-сатақа т.б. сынды құлшылық амалдарда ниет дұрыс болмаса, сауабы болмайды. Ислам тағылымында сырт көрінісінен қарағанда ішкі жан-дүниесінің, яғни ниеттің таза және шынайы болуы маңызды. Ниетсіз амал етіп, бос ысырапшылдықтан сақтанғанымыз дұрыс.
Ислам ғалымдары «Амалдан бұрын ниет етуді үйрен! Ниетке қарай кішкентай амал үлкен амалға, үлкен амал кішкентай амалға айналады. Пенде жақсы ниеттен танбаған сайын, ізгіліктің (жақсылықтың) жолында болады», деген.
Пайғамбарымыз (с.а.у.) хадисінде: «Амалдардың қабыл болуы әрі сауапты болуы ниетке байланысты. Кімде-кім неге ниет етсе, оның қарымтасын алады», деген.
Демек, «Жақсы ниет – жарым ырыс», демекші, жақсылықта алға шығу бос қадаммен емес, шынайы амал – ниетпен болатынын ұмытпағанымыз абзал.
Икрам АЙТАЕВ
