Сұрақ: Маңдайға із қалдыру шариғат талабы ма?
Жауап: Ислам – толық кемелденген дін. Намаз – ислам парыздарының бірі. Намазда екі аяқ, екі тізе, екі қол, маңдай сынды жеті мүшесімен сәжде жасайды.
«Әсәрус сужуд» – сәжде ізі деген мағына береді. Сахабалар кезінде тақуалыққа бой ұрған адамдардың тізелерінде, маңдайында сәжде іздері қалатын. Бұл амал жайлы Құран аяттары мен хадистерде баяндалған.
Қазіргі таңда дінді дұрыс пайымдамай кейбір намазхандар арасында маңдайларына із қалдыратындары да бар. Бұл шариғат талап еткен амалдарға жатпайды. Еліміздегі мешіт сынды құлшылық орындарда кілем, жайнамаз т.б. заттармен намаз оқуға жағдайлар жасалған. Ал сәжде іздерін қалдыру мақсатында әдейі сәжде орнын қатайтып, салмақ салып, маңдайды қажап із қалдыру – дінде құпталмаған амал.
«Фатх» сүресінің 29-аятында: «Олардың (мүміндердің) белгілері маңдайларында сәждеден қалған іздері арқылы байқалады…» деген. Аталған аятты дұрыс пайымдамай, артық амалдарға баратындары да бар. Негізгі дінде бұйырылған амалдардан артық амал жоқ.
Икрам АЙТАЕВ
