Қазақ қоғамын әбігерге салған жат ағымдар әрекетінің терістігін көптеген хадиспен дәлелдеуге болады. Айталық, пайғамбарымыз (с.ғ.с.) өзінің бір хадисінде мұсылмандардың Алланың жібіне, яғни дініне жабысып, бөлінбеу керек екені жайында айтады.
«Алла сендердің үш нәрсені жасауларыңды ұнатады, олар: біріншіден, Аллаға ғана ғибадат ету, Оған басқаны серік қоспау; Екіншіден, түп-түгел Алланың жібіне жабысып, бөлінбеу; үшіншіден, сендерге басшы болғандарға мойынсұну», – дейді хадисте.
Ал теріс діни ағымдардың түпкі ниеті біреу-ақ, ол – қарапайым адамдарды өз мақсат-мүддесіне пайдалану, сол арқылы материалдық игілікке кенеліп, билікке қол жеткізу.
Олардың халыққа тигізетін зиянына тоқталсақ, біріншіден, жат ағым қатарына қосылған жаңа мүшелер психологиялық қысымға ұшырайды. «Бізден басқа мұсылманның барлығы «адасқан, кәпір» деген сияқты әпсананы құлағына құяды. «Ғасырлар бойы аталарымыз ұстанып келген дәстүрлі ислам қате. Аталарымыз теріс жолда болған. Олар Құдайға серік қосып, күпірлікте болды. Қазақтардың ұстанып жүрген діні бидғатқа толы. Оларды тазалау керек» деп теріс пікірлерді санасына сіңіреді.
Екіншіден, жат ағымға кірген адамдар қоршаған ортасынан іргесін аулақ салып, өз бетінше бөлектене бастайды. Тіпті отбасынан алшақтаған адам уақыт өте келе жаңа «ұстазының» айтқандарының анық-қанығына ой жүгірту, оны шынайы өмірмен салыстыру мүмкіндігінен айырылады.
Үшіншіден, қауіпті ағымдар адамдардың ойлау қабілетін тежейтін түрлі әдістерді қолданады. Психологиялық тәуелділікке ұрынған адам өзінің бұрынғы отбасынан алған қадір-қасиетін, тәлім-тәрбиесін тәрк етіп, сол ағымға ұнамды бейнені қабылдайды. Мұның соңы бөлінуден басқа ешнәрсеге алып бармасы анық.
Ата-бабаларымыздың ұстанған жолы – ауызбірлікпен ел болу еді. Алла Тағала Құран: «Түп-түгел Алланың жібіне (дініне) жабысыңдар да бөлінбеңдер» дегендей, мерейі тасыған, мейірімі төгілген ел боламыз десек, ынтымағымыздан айырылмайық!
Жасұлан БАҚЫТБЕК
