Сұрақ: Ислам діні мен жат ағымның айырмашылығы неде?
Жауап: «Ислам» сөзі «бейбітшілік», «амандық», «тыныштық» деген мағыналарын қамтиды. Дәстүрлі Ислам – көп ұлттар мен ұлыстарды түрі мен нәсіліне қарамай бір шаңырақ астына біріктірген бүкіл әлемдік бейбіт дін. Ислам діні мен қазақ салт-дәстүрі сабақтасып халықтың рухани өмірінен орын тапқан.
Исламның мақсаттарының бірі – бейбітшілік пен татулықты сақтау. «Мәида» сүресінің 3-аятында: «..Міне, бүгін діндеріңді кемеліне жеткіздім, сендерге деген нығметімді тамамдадым және сендер үшін дін ретінде Исламды таңдадым» деген.
Кейбір адасқан діни топтардың жетегінде жүріп, исламды бет перде етіп адастырып жүргендер әлеуметтік желілерде кездеседі. Жылтыраған уағыздарға әуес болмай, сақ болғанымыз дұрыс. Мұндай адасқан діни топтарға дін негіздерін білмейтіндер, дұрыс ақпараттарға жүгінбейтіндер т.б. кез болады. Нәтижесінде қателігін түсініп, тәубеге кеш келіп, мәселе дінде емес, адамда екенін аңғарады.
Кереғар діни ағымдардың алдын алу мақсатында ҚМДБ-ның ресми сайттары мен имамдары, теолог, дінтанушылардың сөзін тыңдаған абзал. Діни ағымдардан сақтану негізі – дұрыс ақпараттарға жүгіну.
Икрам АЙТАЕВ
