Сұрақ: Періште деген кімдер?
Жауап: Иман – арабтың «сену», «растау» деген ұғымдарын білдіреді. Періштелерге иман ету – парыз. Ол – иманның жеті шартының бірі.
Періштелер нұрдан жаратылған. Олар Алланың барлық әмірін бұлжытпай орындайды, жағымды бейнеде ғана көріне алады. Періштелердің болмысына ішіп-жеу, ұйықтау, үйлену, ұрпақ сүю тән емес, оларда жыныстық сипат болмайды, күнәсіз әрі нәпсісі жоқ. Қиялға беріліп, періштелерді орынсыз, түрлі сипаттармен сипаттауға болмайды.
Періштелердің көп екендігі аяттар мен хадистерде кездеседі. Есімдері белгілі періштелер: Жәбірейіл – Алла Тағаладан пайғамбарларға уахи жеткізуші періште, Микәйіл – адамдарға ризық жеткізуші, несібе таратушы періште, Исрафил – Қиямет күні сүр үрлеуші періште, Әзірейіл (Мәләкул-мәут) – тіршілік атаулының жанын алушы періште, Ридуан – Жәннәт періштесі, Мәлик– Тозақ періштесі, Мүнкәр мен Нәкір – қабірде сұрақ қоюшы періштелер, Кираман–Кәтибин – адамның оң және сол жақ иықтарында отырып, әрбір істері мен сөздерін жазып алушы періштелер, Хәмәләй арш – Аршыны ұстап тұрушы періштелер.
Пайғамбарымыздан (с.а.у.) Жәбірейіл (а.с.) періште иман турасында сұрағанда, Алла Елшісі: «Аллаға, періштелеріне, кітаптарына, елшілеріне, ақырет күніне, тағдырға, оның жақсылығы мен жамандығына сенуің», – деп жауап берген.
Икрам АЙТАЕВ
