Сұрақ: Құдайға шүкіршілік қалай жасалады?
Жауап: Мұсылман адам барына шүкіршілік етіп жүрсе, Алла істеген амалдарының берекесін береді. Адам Раббысына шүкіршілік ету арқылы ризашылығын білдіреді. Шүкіршілік етудің бірнеше түрлері бар: амалмен, тілмен, жүрекпен, сәжде жасаумен шүкіршілік жасауына болады.
Амалмен жасалатын шүкіршілік: Алланың бұйырған амалдарын орындап, тыйған амалдарынан сақтану, пайдалы еңбек ету, садақа, зекет беру арқылы жасалатын амалдар.
Тілмен шүкіршілік ету: Әлхамдулиллаһ, субханАллаһ, Аллаху Акбар, я Алла, берген нығметтеріңе шүкір деген мазмұндағы сөздер т.б. айту.
Жүрекпен шүкіршілік білдіру: Алланың кеңшілікпен берген нығметтеріне қанағат, шүкіршілік етіп жүрекпен сену.
Сәждемен шүкіршілік жасау: Бір қиыншылықтан арылғанда, Алланың берген ерекше нығметіне бөленгенде сәжде жасап мадақ, дұға айту.
Пайғамбарымыз (с.а.у.) хадисінде: «Әлхамдулиллаһ» (Аллаға мадақ айту) – шүкірдің басы. Аллаға мадақ айтпаған пенде Оған шүкіршілік жасамағаны» деген. «Ибрахим» сүресінің 7-аятында: «Егер шүкіршілік етсеңдер нығметтерімді арттырамын. Ал егер жақсылықтың қадірін білмесеңдер, онда азабым расында да тым қатты», «Бақара» сүресінің 172- аятында: «Әй мүміндер! Біз сендерге ризық етіп берген нәрселеріміздің жақсыларынан (адалдарынан) жеңдер. Және Аллаға шүкірлік етіңдер, егер (шын мәнінде) оған құлшылық ететін болсаңдар». Шынайы ниетпен жасалған амалдар, жақсылық пен кемелділіктің кепілі.
Икрам АЙТАЕВ
