Сұрақ: Азан айтылғаннан кейін дұға жасауға бола ма?
Жауап: Азан сөзінің «хабар беру» деген мағынасы бар. Күнде бес уақыт намаз кіргенде азан айтылады. Азан айтылған уақытта тыңдау абзал. Одан кейін арнайы дұға оқу – сүннет және құпталған амалдардан.
Елімізде кейбір мәзһаб ұстанбайтын азаматтар дұға жасамайды. Оларға еліктеуге болмайды.
Ал, азаншының айтқан сөздерін іштей немесе дауыстап қайталауға болады. Азанның соңында айтылатын дұға: “Аллаһумма Раббә һазиһид-даъуатит-тәәмма уас-салатил-қааймә әәти Мухаммәдәнил-уәсииләтә уәл-фадииләтә, уәд-дәрәжәтәр-рафиъта. Уәбъсһу мақаамәм махмудәниллази уъаттәһ. Иннәкә ләә тухлифул-миъад”, қазақша мағынасы «Ей мына толық азан мен оқылатын намаздың Раббы! Хазіреті Мұхаммедке арқау болуды, ерен ерекшелікті және жоғары дәрежені бер! Және де оны өзің уәде еткен «Махмуд шыңына» жеткіз. Сен өзіңнің берген уәдеңді орындайтыныңа ешқандай күмән жоқ».
Сондай-ақ азанның мәтіндеріндегі «Хайә ълас-саләһ» пен «Хайя ълал-фәләх» кезінде тыңдаушы «Ләә хаулә уә ләә қууәтә иллә билләһ» деп айтуына болады.
Пайғамбарымыздың (с.а.у.) хадисінде: «Кім азанды естігеннен кейін: «Аллаһумма Раббә һазиһид-даъуатит-тәәмма уас-салатил-қааймә әәти Мухаммәдәнил-уәсииләтә уәл-фадииләтә, уәд-дәрәжәтәр-рафиъта.Уәбъсһу мақаамәм махмудәниллази уъаттәһ…» деп айтса, Қиямет күні оған менің шапағатым міндетті болады», деген.
Демек, азаннан кейін мүмкіншілік болса дұға жасау дұрыс амалдардан екен.
Икрам АЙТАЕВ
