Мекке қаласында Қазақстан мұсылмандары діни басқармасының атынан қазақстандық қажылардың құрметіне арнайы дастарқан жайылды.
Іс-шараға Қажылық миссиясының төрағасы Ершат қажы Оңғар, Қазақстанның Жидда қаласындағы Бас консулы Руслан Қоспанов, миссия мүшелері, 16 қажылық компаниясының жетекшілері, уағыз-насихатқа жауапты имамдар мен қажылар қатысты.
Рухани басқосу қасиетті Құран аяттарын оқумен басталды. Бұдан кейін миссия төрағасы Ершат Оңғар меймандарға Бас мүфти Наурызбай қажы Тағанұлының дұғай сәлемін жеткізіп, қажыларға құт-береке тіледі және қажылық жөнінде насихат айтты.
Сондай-ақ, рухани шарада Бас консул Руслан Тобылұлы, Қазақстан қажыларына қызмет көрсететін «Машариқ әл-Мутамаииза» мекемесінің Атқарушы президенті Мұхаммед Әмин Әл-Әндиргири және жазушы Смағұл Елубай сөз сөйлеп, қажыларға ізгі тілегін арнады.
