Қызылорда облысы ҚАЖ департаментіне қарасты ЗК-169/1 тергеу изолияторында экстремзим және терроризм көзқарастары бойынша сотталған азаматтар қамауда отыр. Бұл азаматтарды дәстүрлі емес діни топтар өздерінің ықпалына түсіріп, қазақ халқының аксиологиялық құндылықтарынан ажыратып, тарихы мен мәдениетінен, салт-дәстүрі мен әдеп-ғұрыптарынан және діні мен ділінен айыруға тырысты.
Мұндай дәстүрлі емес діни топтардың идеялогиясына қарсы діни, тарихи, мәдени және саяси тұрғыдан иммунитет қалыптастыру мақсатында, облыстық Дін істері басқарамасының «Дін мәселелерін зерттеу орталығы» КММ бастығының орынбасары Аралбек Боранбаев мекемеге келіп, теріс ағымға түскен жандармен кездесу өткізді.
Ол адасқан жандарға, қазіргі таңда жастарымыздың басым көпшілігі «таза ислам» деген сөзге алданып, «жихад» деген ұғымды сылтау етіп, ел бірлігі мен діни тұтастыққа қауіп төндіретінін айтып, саяси ойынның құрбаны болып кетпеу қажет екенін түсіндірді.
Сонымен қатар, қазақ халқының ғасырлар бойына қалыптасқан діни-рухани көзқарасы мен мәдени мұраларын оқып үйреніп, алдағы уақытта дәстүрлі емес діни топтардың арбауына түспеуге шақырды. Дін істері басқарамасынан келген өкілмен әңгімелесу еркін форматта өткендіктен, жазасын өтеушілер өз ойларын ашық білдірді.
– Алғаш діни сабақ ала бастағанымда, нағыз дін арабтарда, сол үшін тек қана арабтардан оқып білу керек. Шелпек тарату, құран бағыштауға болмайды, намаз оқымаған адам кәпір, оның затын тартып алуға болады деп үйретті. Ал, қазіргі Аралбек Жұбатқанұлымен өткен сұхбат арқылы, керісінше кешегі ата-бабамыз ұстанған тарихи сана бүгінгі діни ұстанымның негізі екенін түсіндім, – деді Т. есімді сотталған.
Қызылорда облысы ҚАЖД баспасөз қызметі
